Biləsuvarda ənənəvi Hind Quşu festivalı keçirildi - FOTO

Biləsuvarda ənənəvi Hind Quşu festivalı keçirilib.

Avtosfer.az xəbər verir ki, festival bu il də minlərlə insanın yaddaşında xoş təəssüratlarla qalıb.

Tədbirdə hind quşundan bişirilən ləziz yeməklər, yerli ustaların əl işlərindən hazırlanmış suvenirlər, rəngarəng sərgi stendləri və kənd həyatının özünəməxsus ab-havasını əks etdirən nümunələr nümayiş olunub.

Qeyd edək ki, artıq beş ildir ki, Biləsuvarda ənənə halını almış bu festivalda ölkəmizin müxtəlif bölgələri ilə yanaşı, xarici ölkələrdən gələn qonaqlara da milli mətbəximiz və sənət nümunələri təqdim edilir, adət-ənənələrimiz geniş şəkildə nümayiş olunur.

Ziyarətçilər həvəskar aşpazların hind quşundan hazırladıqları müxtəlif növ yeməklərdən dadmaq imkanı əldə ediblər.

Tədbirdə onlarla turizm və aqrar sahədə fəaliyyət göstərən şirkətlər də öz məhsullarını təqdim ediblər. Bu dəfəki festivalda bir sıra xarici ölkələrdən gələn aşpazlar da iştirak edərək öz milli mətbəx nümunələrini hazırlayıb qonaqlara təqdim ediblər.​