“Bizdə mümkün deyil” stereotipini qırmaq mümkündürmü? - FOTO

Bakı şəhərində nəqliyyatın vəziyyəti ilə bağlı çox deyilib, çox yazılıb. Lakin obyektivlik naminə müəyyən işlərin də görüldüyünü demək lazımdır. 

Çox zaman ekspertlər hansısa qabaqcıl təcrübədən danışdıqda “bizdə mümkün deyil”, “Avropada olar, bizdə yox”, “bakıda maşın çoxdur” kimi şablon ifadələr qarşılaşırlar. Amma təcrübə göstərir ki, Bakıda da uğurlu layihələr həyata keçirmək mümkündür. 

Bu fotolar ötən dekabrda istismara verilmiş Xocəsən stansiyasının qarşısında çəkilib. Bura yeganə stansiyadır ki, taksilər (o cümlədən manatlıq), manatlıq mikroavtobuslar sərnişin çağırmır. Avtobuslar üçün nəzərdə tutulmuş yol ciblərinə heç kim daxil olmur. Avtobuslar stansiya qarşısındakı dayanacağa rahatlıqla girib-çıxa bilir. 

Bu stansiyanın açılması ilə ərazidə qanunsuz sərnişindaşıma yox dərəcəsinə enib. Çünki metronun təqdim etdiyi keyfiyyəti başqa heç bir nəqliyyat təqdim edə bilmir.  

Bir sözlə, Xocəsən təcrübəsi göstərdi ki, nəqliyyatda inzibati yolla tənzimləmə səmərə vermir. Çıxış yolu seçim imkanları yaratmaqdır. O zaman hər şey qaydasına düşəcək. Digər nəqliyyat növlərinin işi də öz axarında gedəcək.

Qeyd edək ki, metronun Xocəsən stansiyası 23 dekabr 2022-ci ildə Azərbaycan prezidentinin iştirakı ilə istismara verilib.

Vüqar