Bu şirkətin yüzlərlə əməkdaşı pul çatışmazlığına görə işlərini itirəcək

“Amazon”a məxsus canlı yayım xidməti “Twitch” itkiləri azaltmaq üçün işçilərinin 35 faizini ixtisar edəcək.

Avtosfer.az xəbər verir ki, şirkətin 500-ə yaxın əməkdaşı işini itirəcək.

Buna səbəb “Twitch”in artan itkiləri, həmçinin son aylarda bir neçə top-menecerin şirkətdən getməsidir.

Şirkətin əsas xərci məzmun üçün bulud yaddaşının icarəsidir. Belə ki, xidmət hər ay 1,8 milyard saat video yaradır. Hətta “Twitch”in dünyanın ən böyük bulud serverləri provayderi olan “Amazon”un infrastrukturundan istifadə etməsi də vəziyyətə kömək etmir.

Şirkət son vaxtlar reklama çox diqqət yetirməsinə baxmayaraq, “Amazon”un qanadı altında mövcud olduğu 9 il ərzində qazanc əldə edə bilməyib.

Qeyd edək ki, “Twitch”in mətbuat xidməti qarşıdan gələn geniş miqyaslı ixtisarlarla bağlı məlumatları şərh etməyib.

Məhəbbət Tərlanoğlu