İçərişəhərdəki hadisə ilə bağlı rəsmi açıqlama - VİDEO

Ötən gün İçərişəhər ərazisində yerləşən bir neçə restoran şəbəkəsinə enerji verən elektrik kabellərində kiçik partlayışlar baş verib.

Avtosfer.az xəbər verir ki, bu barədə sosial şəbəkələrdə məlumat və görüntülər yayılıb.

Partlayış nəticəsində qısa müddətlik tüstülənmə və yanğın müşahidə edilib.

“İçərişəhər” Dövlət Tarix-Memarlıq Qoruğu İdarəsi yanğın hadisəsi ilə bağlı açıqlama yayıb. Məlumatda bildirilib ki, hadisə nəticəsində xəsarət alan olmayıb: “Ötən gün saat 19:45 radələrində İçərişəhər Kiçik Qala 8-də yerləşən iaşə obyektində enerji verən elektrik kabellərində kiçik partlayışlar baş verib. Yanğın hadisəsinin qarşısının alınması məqsədilə “İçərişəhər” Dövlət Tarix-Memarlıq Qoruğu İdarəsinin Mühafizə Xidməti yaxınlıqda olan vətəndaşları ərazidən uzaqlaşdırıb və dərhal Fövqəladə Hallar Nazirliyinin (FHN) “112” qaynar telefon xəttinə zəng edilərək hadisə barədə məlumat verilib.

Əraziyə FHN-in Dövlət Yanğından Mühafizə Xidmətinin əməkdaşları cəlb olunub və yanğının genişlənməsinin qarşısı alınıb. Hadisə nəticəsində ətraf binalara heç bir zərər dəyməyib və yanğınsöndürənlərdən və Qoruq İdarəsinin mühafizə işçilərindən xəsarət alan olmayıb”.

Qurumdan, həmçinin bildirilib ki, iaşə obyektinin elektrik naqilləri “Azərişıq” ASC tərəfindən bərpa edilib.