İran Ermənistan və Qazaxıstanla birlikdə müntəzəm dəniz marşrutu açır

İranın Əmirabad limanı Ermənistan və Qazaxıstanla birlikdə müntəzəm dəniz marşrutu açmaq təklifi ilə çıxış edib.

"Azad İran" "Telegram" kanalı xəbər verir ki, bunu İranın Əmirabad Limanları və Dənizçilik İdarəsinin rəisi Məhəmmədli Musapur Gənci Mazandaran əyalətinin Behşehr şəhərində Ermənistan və Qazaxıstan nümayəndə heyətləri ilə görüşdə bəyan edib.

İran rəsmisi limanın Şimal-Cənub dəhlizində strateji mövqedə yerləşdiyini vurğulayıb, onun yeni marşrutlar, multimodal daşımaların inkişafı baxımından böyük əhəmiyyət daşıdığını bildirib.

Görüşdə logistika və tranzit sahələrində əməkdaşlığın genişləndirilməsi yolları müzakirə edilib.

Bundan əlavə, liman, gəmiçilik şirkətləri və yükdaşıyıcıları arasında üçtərəfli sazişin imzalanması nəzərdə tutulur.

Təxminən 1300 hektar ərazisi olan Əmirabad Xəzər dənizinin ən böyük limanıdır. O, dəmir yolu şəbəkəsinə qoşulub, 10 milyon ton yük daşımaq gücünə malik 15 körpüyə malikdir.

Həştərxan, Aktau, Bakı və Xəzərin digər limanlarından yüklər bu limanlın ərazisindən daşınır.

Əmirabad Asiya və Avropanı birləşdirən Şimal-Cənub dəhlizinin mühüm nəqliyyat qovşağına çevrilə bilər.