Millət vəkili Qənirə xanım Paşayeva Fəxri Üzv seçildi

Sentyabr ayının 13-də “Azərbaycan Qan Donorluğunun İnkişafı Mərkəzi” nin idarə heyətinin qərarı ilə millət vəkili, Milli Məclisin Mədəniyyət Komitəsinin sədri Qənirə xanım Paşayeva AQDİM-nin idarə heyətinin Fəxri Üzvü seçilib.

Görüş zamanı millət vəkili, Milli Məclisin Mədəniyyət Komitəsinin sədri Qənirə xanım Paşayeva çıxış edərək  Mərkəzə bundan sonra da diqqət və qayğısını  əsirgəməyəcəyini, daim dəstək olacağını  qeyd edərək Mərkəzə gələcək işlərdə bol-bol uğurlar arzulayıb.

Daha sonra AQDİM-in idarə heyətinin sədri Fuad Rəsul və  idarə heyətinin üzvləri  göstərilən xüsusi diqqət və nəvazişə  görə öz dərin təşəkkürlərini bildirərək   millət vəkili Qənirə xanım Paşayevaya AQDİM-nin idarə heyətinin Fəxri Üzvlük tablosunu təqdim ediblər.

“Azərbaycan Qan Donorluğunun İnkişafı Mərkəzi” nin mətbuat xidmətindən verilən məlumata əsasən, “AQDİM”-nin əsas məqsədi Azərbaycan Respublikasının müvafiq dövlət orqanları və özəl sektorlarla qan donorluğu sahəsində yaxından əməkdaşlıq etmək, eyni zamanda Bakı və regionlarda bu istiqamətdə aparılan işin daha da gücləndirilməsinə dəstək verməkdir. Həmçinin qan donorluğu və irsi qan xəstəliyi ilə bağlı gənclər arasında təbliğatın gücləndirilməsinə xidmət etməkdir.

Qeyd edək ki, qan vermə aksiyaları və təbliğat xarakterli tədbirlər Azərbaycan Respublikasının Prezidenti cənab İlham Əliyevin təsdiq etdiyi "Hemofiliya və Talassemiyadan əziyyət çəkən uşaqlara qayğı" Dövlət Proqramına uyğun, həmçinin Heydər Əliyev Fondunun "Talassemiyasız həyat naminə" proqramı çərçivəsində təşkil olunur.