Ötən il metrodan ən çox istifadə dekabr ayında olub

İlin digər ayları ilə müqayisədə dekabr ayında metroda sərnişinlərin sayı artıb. Dekabr ayında “Bakı Metropoliteni” Qapalı Səhmdar Cəmiyyəti 544 min 830-u güzəştli olmaqla, 21 milyon 249 min 687 sərnişin daşıyıb. Bu, orta statistik hesabla gün ərzində 685 min 474 sərnişin deməkdir. Ay ərzində iş günlərində isə orta statistik hesabla 763 min 390 sərnişin metropolitenə daxil olub.

Avtosfer.az-ın “Bakı Metropoliteni” QSC-ə istinadən xəbərinə görə, ən çox dekabrın 4-də sərnişinlər metrodan istifadə ediblər. Belə ki, qeyd olunan tarixdə 804 min 556 nəfər sərnişin metropolitendən istifadə edib. Ən az sərnişin isə dekabr ayının 17-də daşınıb – 378 min 605 nəfər.
Postpandemiya dövründə sərnişin sayının əsaslı şəkildə artmağa başladığı, 3-cü rüb ərzində orta statistik hesabla gün ərzində 681 min 104 sərnişin metropolitenin daşıma xidmətinə müraciət edib.

Metropolitendən istifadə imkanı məhdud olan sərnişinlər üçün nəzərdə tutulan “Əlçatan metro” layihəsi üzrə dekabr ayı ərzində 81 sifariş daxil olub və hamısı icra olunub.
2022-ci ilin dekabr ayı ilə müqayisədə hesabat ayında 43 min 937 və yaxud 0.2 fazi daha az sərnişin daşınıb. 2019-cu ilin dekabrı ilə müqayisədə 2023-cü ilin son ayında 6.87 faiz az sərnişin daşınıb. Bütün bunlara rəğmən 2023-cü ildə ən çox sərnişin dekabr ayında daşınıb.