“Qubadlı” təchizat gəmisi əsaslı təmir olunub

“Azərbaycan Xəzər Dəniz Gəmiçiliyi” QSC-yə (ASCO) məxsus “Qubadlı” təchizat gəmisinin əsaslı təmiri başa çatıb. Gəminin təmiri “Bibiheybət” Gəmi Təmiri Zavodunda həyata keçirilib.

ASCO-dan Avtosfer.az-a verilən məlumata görə, təmir müddətində baş mühərriklər, braşpil və şpil qurğusu, nasoslar, hava balonları, boru sistemləri, su keçirməyən qapılar, illyuminatorlar, lyük və ventilyasiya qapaqları, lazımi elektrik avadanlıqlar təmir olunub, FRS balkasının təmir və sınaq işləri yerinə yetirilib, baş göyərtədə taxta döşəmənin qüsurlu sahələri dəyişdirilib.

Bundan əlavə təmir çərçivəsində digər işlər də yerinə yetirilib.

İşlər başa çatdıqdan sonra mexanizm və elektrik avadanlıqlarının hərəkətdə yoxlanılması məqsədilə gəmi dəniz sınağına çıxarılıb. Müvəffəqiyyətlə başa çatan sınaq işlərindən sonra “Qubadlı” yenidən istismara qaytarılıb.