Tanınmış fitnes məşqçisi onu bıçaqlayanı bağışladı - “Anasından ayırmaq istəmirəm”

Bakıda gecə klubunda tanınmış fitnes məşqçisi Fərid İsmayılovu bıçaqlayan şəxsin məhkəməsi başa çatıb.

Avtosfer.az qafqazinfo-ya istinadən xəbər verir ki, Bakı Ağır Cinayətlər Məhkəməsində keçirilən prosesdə 2001-ci il təvəllüdlü İntiqam Muxtarova hökm oxunub.

Bildirilib ki, İntiqam daha əvvəl də bıçaqlanma cinayəti törədib və məhkum edilib. Lakin 2021-ci ildə imzalanan Amnistiya aktı çərçivəsində cəzadan azad olunub.

Hadisəyə gəlincə isə, İntiqam həmin gün dostları ilə birgə Xətai rayonunda - Ağ Şəhərdəki Yaşıl ada küçəsində yerləşən “Pubar” klubuna gedib və orada musiqi sifariş etməyə görə Fəridlə dava edib. Nəticədə İntiqam Fəridin başına pivə bakalı çırpıb, onu kürək və boyun nahiyələrindən bıçaqlayıb.

Məhkəmədə Fərid bildirib ki, İntiqamın anası ağır xəstədir və buna görə onu bağışlayır, ana ilə oğlu ayırmaq istəmir. Lakin İntiqamın daha əvvəl də cinayət törətməsi və digər hallar əsas götürülərək ona 5 il 6 ay həbs cəzası verilib.

Təqsirləndirilən şəxsin cəzasını ciddi rejimli müəssisədə çəkməsi də hökmdə vurğulanıb.

Qeyd edək ki, Fərid İsmayılov uzun müddətdir ki, müxtəlif idman zallarında idman təlimçisi kimi işləyir. Nərimanov rayonunda ona məxsus “Lux” idman zalı var.