Şəkidə tarixi binada problemlər var - FOTO

Şəkidə ipəkçiliyin tarixi və onun şəhərin həyatındakı əhəmiyyəti barədə uzun danışmağa lüzum yoxdur. Bu barədə internetdə kifayət qədər məlumat var.
Lakin son illərdə ipək istehsalı azalıb, keçmiş Şəki İpək Kombinatının (indi Azəripək ASC) binalarının bir qismi istifadəsiz qalıb. Bunlardan biri də 3 nömrəli İpək Fabrikinin binasıdır.  

Lakin istifadəsiz qalmaq heç də istifadəyə yararsız olmaq anlamına gəlmir. Hansısa bir binanın təyinatını dəyişərək ondan gəlir əldə etmək mümkündür. Təbii ki, müəyyən rekostruksiya aparmaq şərti ilə. Burada da bir güllə ilə 2 dovşün vurmaq mümkündür: şəhərdə turizm obyektlərinin sayı artacaq, müvəqqəti və daimi iş yerləri yaranacaq. Son nəticədə vətəndaş məmnunluğu təmin olunacaq. 

Binanın girişindəki elandan məlum olur ki, tikili yerli əhəmiyyətli abidə statusundadır və dövlət tərəfindən qorunur. Çox gözəl. Amma belə qorunma olurmu? Darvazadan içəri nəzər yetirdikdə gördük ki, həyətdə cəngəllikdir, kol-kosun hündürlüyü adamın boyunu aşır. Tikili özü də uçub-tökülür. 
Amma ən maraqlısı binanın qarşı deyil, yan tərəfində idi. Xan məscidindən çıxarkən (bu məscidin rekostruksiyası yüksək səviyyədə həyata keçirilib ki, bunu da alqışlamaq lazımdır) binanın ikinci mərtbəsindən boylanan keçiyə rast gəldim. Təəssüf ki, telefonun imkanı daha keyfiyyətli foto çəkməyə imkan vermədi. 

Belə bir sual da ortaya çıxır: bu binadan hansı məqsədlə istifadə etmək olar? Cavab da sadədir: buranı ipəkçilik muzeyinə çevirmək mümkündür. 

Hazırda Şəki Tarix Muzeyində bərpa işləri gedir. Yəqin ki təmir azı 1 il çəkəcək. Təmirin yüksək keyfiyyətlə aparılacağına əminəm, lakin fakt faktlığında qalır: Bu muzeyin binası Şəki kimi zəngin tarixi olan ərazini bütövlükdə əks etdirmək üçün kiçikdir. Buna görə də, Şəki Tarix Muzeyindən bəzi eksponatları çıxararaq və əlavə əşyalar cəlb edərək İpək Fabrikinin tərk edilmiş binasında ipəkçilik muzeyi yaratmaq mümkündür. 

Həm də unutmayaq ki, Şəki Azərbaycanda manufaktura istehsalının ilk mərkəzlərindəndir. 

Digər tərəfdən, Muzeyin tarixi binada yerləşməsi ona xüsusi bir kolorit verər. 

Uçulub-dağılan binaya yeni həyat verməklə ərazidə turistlərin görə biləcəyi yerlərin də sayını artırmaq mümkündür. Bu da heç şübhəsiz uzunmüddətli gəlir mənbəyidir.

Vüqar