Üç erməni Krım körpüsündə terror aktına görə ömürlük həbs olundu

Krım körpüsündəki terror aktında iştirak edən üç erməni - Artyom və Qriqori Azatyanlar, eləcə də yük maşınının sürücüsü Artur Terçanyan bununla bağlı məhkəmə işində digər beş fiqurantla birlikdə ömürlük azadlıqdan məhrumetmə cəzasına məhkum olunublar.

Bu barədə Avtosfer.az "Sputnik Ermənistan" "Telegram" kanalına istinadən xəbər verir.

Məlumata görə, qərar bu gün Rostov şəhərindəki Cənub Dairəsi Hərbi Məhkəməsi tərəfindən verilib.

Qeyd edək ki, insidentdə 8 nəfər təqsirli bilinib: Artyom və Qeorqi Azatyanlar, Oleq Antipov, Aleksandr Bılin, Vladimir Zloba, Dmitri Tyajelıx, Roman Solomko və Artur Terçanyan.

Təqsirləndirilən şəxslər (fiqurantlar) terror aktı və silah və ya partlayıcı maddələrin qanunsuz dövriyyəsində ittiham olunurlar. Bundan əlavə, Solomko və Terçanyana qarşı, həmçinin partlayıcı qurğuların qaçaqmalçılığı üzrə ittiham irəli sürülüb.

Xatırladaq ki, 8 oktyabr 2022-ci ildə səhər Krım körpüsündə yük maşını partlayıb və yanacaq çəni alovlanıb. Hücum nəticəsində 5 nəfər həlak olub. Hadisə ilə bağlı cinayət işi açılıb. Daha sonra Rusiya Federal Təhlükəsizlik Xidməti (FTX) Krım körpüsünə hücumda iştirak edən 8 nəfərin həbs olunduğunu bildirib. İstintaq versiyasına görə, hücumun təşkilatçısı Ukrayna hərbi kəşfiyyatının rəhbəri Kirill Budanov olub. Ukrayna Təhlükəsizlik Xidməti sədrinin birinci müavini Malyuk və şəxsiyyəti müəyyənləşdirilməyən şəxslər qrup yaradıblar və bu qrupa qeyd edilən fiqurantlar cəlb olunublar.

Daha sonra körpüyə çatdırılan partlayıcı maddə Ukraynada istehsal edilib. Qurğu tikinti polietilen plyonka rulonlarında gizlədilib və mürəkkəb marşrutla Odessadan gətirilib - Ermənistan, Gürcüstan və Ukrayna vətəndaşlarının köməyi ilə yük Poti limanına daşınıb, İrəvanda gömrükdən keçirilib və "Verxniy Lars" buraxılış məntəqəsindən Rusiyaya aparılıb. Marşrutun təşkilatçısı ukraynalı Andrey Şaraşidze olub.