Ukrayna limanlarından ərzaq daşıyan 4 gəminin yola salınmasına icazə verilib

İstanbuldakı Birgə Koordinasiya Mərkəzi ümumilikdə 58.8 min ton ərzaq daşıyacaq daha dörd gəminin Ukrayna limanlarından yola salınmasına icazə verib.

Bu barədə Koordinasiya Mərkəzindən bildirilib.

Məlumata əsasən, “A-Line” və “Sevil” quru yük gəmiləri Çornomorskdan yola düşərək Misir və Rumıniyaya müvafiq olaraq 10.7 min ton qarğıdalı və 4.7 min ton kolza çatdıracaq. Daha iki gəmi – “Super Bayern” və “Lucky” Yujnı limanından çıxacaq. Birinci quru yük gəmisi 33 min ton qarğıdalı ilə Misirə yola düşəcək, ikincisi isə Yunanıstana 4400 ton arpa və 6 min ton qarğıdalı çatdıracaq.

Bütün gəmilərin sentyabrın 9-da dənizə çıxması gözlənilir.