Vaşinqton “HƏMAS”a qarşı yeni sanksiyalar tətbiq etmək niyyətindədir

ABŞ Maliyyə Nazirliyi radikal “HƏMAS” hərəkatına qarşı yeni sanksiyalar tətbiq etməyə hazırlaşır.

“Report” xəbər verir ki, bu barədə “Axios” məlumat yayıb.

Qeyd olunub ki, ABŞ Maliyyə Nazirliyi bu həftə “HƏMAS”ın bir neçə liderinə qarşı yeni sanksiyalar tətbiq ediləcəyi barədə məlumat yayacaq.

Xüsusilə, buna nazirlikdə maliyyə kəşfiyyatı və terrorizmlə mübarizəyə cavabdeh olan Xəzinədarlıq katibinin müavini Brayan Nelson eyham vurub.

Onun sözlərinə görə, “HƏMAS”ın maliyyələşdirilməsi ilə mübarizə üçün bütün mövcud vasitələrdən istifadə ediləcək. Nelson vurğulayıb ki, ABŞ-ın və beynəlxalq maliyyə sistemləri HƏMAS-ın zorakılıq kampaniyasını alovlandırmaq qabiliyyətini inkar etməlidir.