Yeni Günəş ləkəsi geomaqnit fırtınasına səbəb ola bilər - Alimlər xəbərdarlıq edir

Günəşin Yerə baxan tərəfində nəhəng bir ləkə topası meydana çıxıb. Avtosfer.az xəbər verir ki, bu barədə “Live Science” məlumat yayıb. Alimlər bu topanın ümumi sahəsinin bir vaxtlar tarixdə qeydə alınmış ən böyük geomaqnit fırtınasını yaradan sahəyə bərabər olduğunu bildirirlər. Nəşr qeyd edir ki, 1859-cu ildə baş verən geomaqnit fırtınası, həmçinin "Kerrinqton hadisəsi" kimi tanınır və tarixdə qeydə alınmış ən güclü geomaqnit fırtınası olub. Alimlərin açıqlamasına görə, günəş ləkələri, görünməz maqnit sahəsi xətləri əyildikdə və partladıqda kosmosa enerji buraxır. Bu enerji partlayışları günəş alovları kimi tanınan güclü radiasiya hadisələrinə səbəb olur. Nəticədə Yer kürəsində müvəqqəti radio kəsintiləri və koronal kütlə atılması kimi tanınan nəhəng, sürətlə hərəkət edən plazma buludları müşahidə oluna bilər.