Avtomobildə tibbi çantanın əhəmiyyəti nə qədər önəmlidir? - Ekspert danışdı - VİDEO

Texniki baxış zamanı ən əsas tələblərdən biri də avtomaşında tibbi çantanın olmasıdır. Bəs, tibbi çantanın olması vacibdirmi? Axı hər dərmanın saxlanma temperaturu və şəraiti fərqlidir. Maşında necə, bu temperaturu qoruyub saxlamaq olurmu? Dünyada bu məsələyə yanaşma necədir?
Avtosfer.az xəbər verir ki, ekspert Elməddin Muradlının sözlərinə görə, tibbi çanta ilə bağlı qarışıq bir vəziyyətin ortaya çıxması birbaşa Səhiyyə Nazirliyinin günahıdır:

“Bir qurum özü özünü təkzib edib siyahı formalaşdırıb. Nazirlik tələb edir ki, tibbi çantada bu dərmanlar olmalıdır. Həkimlər isə deyir ki, bəzi dərmanların hava şəraitindən asılı olaraq tərkibi dəyişir. Yəni bu dərmanlar avtomobildə tez xarab olur ki, bu da kiminsə zəhərlənməsinə səbəb ola bilər. Yol polisi özündən demir ki, maşına tibb çantası qoymalısan. Onlar qanuna əsaslanır və texniki baxışda tələb etdiklərindən biri də tibbi çantanın olmasıdır”.

Ekspert bu problemin həllindən də danışdı:

“Günün tələbinə və beynəlxalq qaydalara uyğun olaraq, tibb çantası ilə bağlı standartlara yenidən baxılmalıdır. Çox sürücünün heç anlayışı da yoxdur ki, o dərmanlar necə saxlanılmalıdır, sadəcə qorxudan alıb qoyublar maşına. Nazirlər Kabinetinin və Səhiyyə Nazirliyinin bu məsələ ilə bağlı verdiyi qərarlara yenidən baxılmalıdır. Milli Məclis səviyyəsində baxılsın, deputatlar bu məsələni qabartsınlar”.
Sonda ekspertin sözlərinə qoşularaq, düzgün saxlanılmamış dərmanları qəbul edib ölməkdənsə, etməyib yaşayaram deyə düşünmək daha məntiqə uyğundur.

Nurlan Sakitoğlu