Azərbaycanda 3 rayonun yolunu kəsib "avtoşluq" edənlər cəzalandırıldı - VİDEO - YENİLƏNİB

Daxili İşlər Nazirliyinin Mətbuat Xidmətinin Lənkəran regional qrupunun baş inspektoru, polis kapitanı Məhəmməd Rzayev oxu.az-a bildirib ki, görüntülərlə əlaqədar dərhal Masallı Rayon Polis Şöbəsində müvafiq araşdırma aparılıb:

“Həmin avtoxuliqanlıq əməlini törədən sürücü Y.İsmayılov və avtomobilin sahibi M.Fəttahlı müəyyən edilərək barələrində toplanmış material hüquqi qiymət verilməsi üçün Masallı Rayon Məhkəməsinə göndərilib. Məhkəmənin qərarı ilə Y.İsmayılov sürücülük hüququ bir il müddətinə məhdudlaşdırılmaqla 15 gün müddətinə inzibati qaydada həbs olunub, M.Fəttahlı isə cərimə olunub”.

“Həmin vaxt orada olan və müxtəlif qayda pozuntularına yol verən digər dörd sürücü barəsində də İnzibati Xətalar Məcəlləsinin müvafiq maddələrinə əsasən inzibati qaydada protokol tərtib edilib”, - deyə o qeyd edib.

***

13:09

Masallıda avtoxuliqanlıq edən sürücünün videosunu oxuculardan biri qeydə alaraq Avtosfer.az-ın qaynar xəttinə göndərib. Belə ki, 90-LR-002 qeydiyyat nişanlı “BMW” markalı avtomobilin sürücüsü Masallı-Yardımlı-Lənkəran yolunu bağlayaraq şou göstərməyə başlayıb. O, hərəkət hissəsində avtomobili qəflətən sürətləndirməklə davamlı olaraq təkərlərin yolun səthi ilə sürtünməsi səslərini çıxarıb və yolun səthində çoxsaylı təkər izləri buraxaraq avtoxuliqanlıq edib.

İnzibati Xətalar  Məcəlləsinin 511-ci maddəsinə əsasən bu xətanı törətmiş sürücünü - nəqliyyat vasitəsini idarə etmək hüququ bir il müddətinə məhdudlaşdırılmaqla beş yüz manatdan yeddi yüz əlli manatadək məbləğdə cərimə və ya nəqliyyat vasitəsini idarə etmək hüququ bir il müddətinə məhdudlaşdırılmaqla işin hallarına görə, onun şəxsiyyəti nəzərə alınmaqla, on beş gündən bir ayadək müddətə inzibati həbs gözləyir.

Leyla