Bakıda manevr qaydasını pozan sürücü cərimələndi - VİDEO

28 iyul tarixində Bakının Hüseyn Cavid prospektində 99-ZT-818 nömrə nişanlı “Nissan Juke” markalı avtomobilin sürücüsünün qayda pozması barədə Avtosfer.az saytında xəbər yayımlanmışdı. Xəbərdə bildirilirdi ki, o, orta zolaqda hərəkətdə olarkən su gölməçəsinə girməmək üçün sağ zolağa keçib, daha sonra isə dairəyə daxil olmaq üçün bir anda sükanı sola döndərərək hərəkətdə olan digər avtomobilin önünə çıxıb. “Nissan”nın sürücüsü həm təhlükəsizlik adacığının üstünə çıxıb, həm də sağdan gələnlərə yol verməyərək təhlükəli şərait yaradıb. Avtosfer.az-a Bakı Şəhər Dövlət Yol Polisi İdarəsindən bildirilib ki, avtomobilin sürücüsü Muradov Zaur Məhəmməd oğlu idarəyə dəvət olunub. Onun haqqında İnzibati Xətalar Məcəlləsinin 327.1 maddəsi ilə protokol tərtib olunub. Sürücü manevr qaydalarını və yol nişanlarının tələblərini pozduğuna görə 40 AZN məbləğində cərimələnib. 

Aysel