Diqqətli olun - Apreldən bu sürücülərin buraxılış sənədi alması məcburi olacaq - VİDEO

Nazirlər Kabineti tərəfindən 2022-ci il 8 aprel tarixində “Avtomobil nəqliyyatı ilə beynəlxalq sərnişin və yük daşımalarına buraxılış Qaydaları” təsdiq edilib. 2023-cü il aprelin 8-də isə qaydaların tətbiqinə başlanılır.

Daşıyıcılara hazırlaşmaq üçün 1 il vaxt verilib. Bu 1 il ərzində Azərbaycan Yerüstü Nəqliyyat Agentliyi (AYNA) tərəfindən daşıyıcılarla mütəmadi görüşlər keçirilib. Daşıyıcılara beynəlxalq yük daşımalarını həyata keçirmək üçün tələb olunan sənədlər və prosedurlar barədə ətraflı məlumat verilib, sənədləri toplamaları üçün köməklik göstərilib. Bu sözləri Ekspert Elməddin Muradlı şəxsi facebook səyfəsində canlı yayımda bildirib. Ekspert həmçinin bildirib ki,  aprelin 8-dən etibarən beynəlxalq yükdaşımalarda iştirak etmək istəyən daşıyıcıların buraxılış vəsiqəsi və kartı olmalıdır.

Qeyd edək ki, AYNA daşıyıcıların və sürücülərin məlumatlandırılması, qarşılaşdıqları çətinliklərin aradan qaldırılması və yaranan sualların operativ cavablandırılması üçün martın 13-dən “Açıq qapı” günləri təşkil edib. “Açıq qapı” günlərində daşıyıcı və sürücülərin müraciətləri və sualları AYNA-nın inzibati binasında “Daşıyıcı bələdçisi” xidməti çərçivəsində və “Bakı KOB evi”ndə AYNA-nın əməkdaşları tərəfindən cavablandırılır.

Nurlan Sakitoğlu
Nərmin Əkbər