Sürücülərə kameralarla qanunsuz cərimələr yazılır - Ekspertdən AÇIQLAMA

Son günlər bəzi sürücülərdən məlumat gəlir ki, onlara sürücülük hüququ olmadan və ya bu hüququ məhdudlaşdırılmış olduğu halda nəqliyyat vasitəsini idarə etməyə görə DYP-nin Mərkəzi informasiya sistemi üzərindən cərimə yazılır.

Şikayət edənlərin bəziləri deyirlər ki, məhdudlaşdırma barədə heç bir məlumatları olmayıb (belə halda məhdudlaşdırma qüvvəyə minmir). Bəziləri isə deyirlər ki, maşını özləri yox, konkret qohumu və ya başqa birisi sürüb. Belə müraciətlər 103.3 FM dalğasında “Düzgün Hərəkət” verilişinə də gəlməkdədir.Lakin bu məsələdə qanundan kənar məqamlar var.

Araşdıranda aydın olur ki, elektron qaydada rəsmiləşdirilən qayda pozuntusu (məsələn, sürət həddini aşama, dayanma qaydasını pozma və s.) törədən avtomobil istifadəçisinin sürücülük hüqunun olmadığı (və ya məhdudlaşdırıldığı) sitemdə görünürsə, DYP həmin şəxsə həm də İXM-in 332.2-ci və ya 332.3-cü maddəsi üzrə cərimə (müvafiq olaraq 100 və ya 300 manat) yazır.

Özü də cəriməni sürücü ilə təmas qurmadan, sistem üzərindən yazır. Bu isə həm qanuna, həm də avtomobildən istifadənin sadə məntiqinə ziddir.

Qanuana uyğunsuzluq ondan ibarətdir ki, İXM-in 122.1-ci maddəsində elektron qərarla rəsmiləşdirilə bilən qayda pozuntuları sırasında İXM-in 332.2-ci, 332.3-cü maddəsi və ümumiyyətlə, 332-ci maddəsi yoxdur. Deməli, bu maddələr üzrə heç bir halda avtomobili idarə edən şəxslə bilavasitə təmas olmadan, onunla görüşmədən cərimə yazıla bilməz. Hətta yol hərəkəti təhlükəsizliyinə nəzarət kamerasından tam aydın görünsə ki, sürən şəxs hüququ olmayan (və ya məhdudlaşdırılmış) şəxsdir, yenə də protokolun və ya qərarın yazılması onun iştirakı ilə olmalıdır. Belə bir ünsiyyət olmadan, avtomobili kimin idarə etdiyi dəqiqləşdirilmədən İXM-in 332.2-ci və 332.3-cü maddəsi üzrə cərimə yazıla bilməz.

Məntiqsizlik isə odur ki, avtomobili təkcə adı sistemdə onun sahibi kimi keçən adam yox, başqa şəxslər də idarə edə bilər. Məsələn, 90 yaşlı nənənin adına olan avtomobili onun nəvələri də idarə edə bilər və s.

Ona görə də sistemdə avtomobilin sahibi kimi görünən şəxsin sürücülük hüququnun olmadığı (və ya məhdudlaşdırılmış olduğu) göründükdə DYP əməkdaşı həmin şəxslə mütləq ünsiyyət qurmalı (ən azından telefon zəngi ilə), kimin sürdüyünü dəqiqləşdirməli, yalnız bundan sonra uyğun addım atmalıdır. Bunun edilməməsi qanun pozuntusudur.

Ərşad Hüseynov, hüquqşünas