Qayda pozan piyadaların kütləvi cərimələnməsi vacibdir - Ekspert çıxış yolunu açıqladı

Son günlər Bakı küçələrində piyadalar yolu necə gəldi keçirlər. Bununla da, həm öz həyatlarını təhlükəyə atırlar, həm də sürücülər üçün böyük problem yaradırlar.

Bu barədə BAKU.WS-in “qaynar xətti”nə çoxsaylı şikayətlər gəlir. Bİldirilir ki, günün istənilən vaxtında belə hallar yaşanır. Lakin gecə saatlarında piyadaların yolu necə gəldi keçməsi vəziyyəti daha da gərginləşdirir.

Ekspertlər də, bildirirlər ki, piyadaların yol-hərəkəti qaydalarına əməl etməsi günü-gündən pisləşir

Nəqliyyat eksperti Elməddin Muradlı BAKU.WS-ə açıqlamasında bildirib ki, əvvəllər bu sahədə mütəmadi marifləndirici və inzibati tədbirlər görülürdü. Bu da, problemin həllində müsbət nəticələr vermişdi.

“Piyadaların kütləvi şəkildə cərimələnməsi, onlara nəzarət olunması problemin həllində yaxşı nəticələr verirdi. İndi bu proses bir az səngiyib.

Yəni əvvəlki qaydada kütləvi nəzarət yoxdur. Düzdür ara-sıra protokollar yazılır və cəzalar verilir. Lakin görünən odur ki, bu kifayət etmir. Birincisi yol təhlükəsizliyi baxımından piyadalar üçün yaradılan yol infrastrukturuna baxmaq lazımdır”, - deyə E.Muradlı bildirib.

Ekspert deyir ki, bu istiqamətdə addımlar atılmalıdır: “Paralel olaraq ciddi nəzarət gücləndirilməlidir. Hazırda Bakı küçələrində piyadaların nizamsız hərəkəti ciddi problemlrə yaradır.

Bəzi küçələrdə sıxlıq və tıxac yaranır. Bəzən işıqforun qırmızı işığından keçən, piyadalar üçün nəzərdə tutulan keçidləri qoyub, təhlükəli yoldan keçən piyadalara rast gəlinir. Bununla da, qəza yaranır və tıxaca səbəb olur. Bununla bağlı ciddi tədbirlər görməyə ehtiyac var”.

Qeyd edək ki, bir neçə gün bundan əvəvl də Bakı şəhər Dövlət Yol Polisi İdarəsi piyadaların ölümü ilə nəticələlən yol nəqliyyat hadisələri ilə bağlı müraciət edib. İdarənin rəsmisi, polis mayoru Araz Əsgərli bildirib ki, piyada vurulması ilə nəticələnən yol qəzaların bir çoxu məhz yerüstü piyada keçidinin altında qeydə alınır:

"Vətəndaşlarımızdan xahiş edirik, öz hərəkətlərinə nizamlı və intizamlı formada yanaşsınlar. Sadə qaydaların tələbini ağır sonluqlu faciələrə qurban verməsinlər.

Yerüstü və yeraltı piyada keçidlərinin olduğu ərazilər kifayət qədər təhlükəlidir. Piyada keçidinin yaxınlığında ondan istifadə etməmək isə təhlükəli olmaqla yanaşı yanlış seçimdir. Yollarda ehtiyatlı olmağı, real təhlükəni bilərək həyatı lüzumsuz bəhanələrə qurban verməməyi bir daha bütün hərəkət iştirakçılarından xahiş edirik!".

Xatırladaq ki, 2023-cü ilin yanvar-mart aylarında 370 və ya 2022-ci ilin müvafiq dövrü ilə müqayisədə 8,2 az yol-nəqliyyat hadisəsi baş verib. Yol qəzalarının 38,4 faizi piyada vurulması ilə nəticələnib.