Qayda pozan sürücüyə irad bildirildi, vecinə almayıb hoqqa verdi - VİDEO

Bakıda qaydaları pozan sürücünün hərəkətləri kameraya düşüb. Avtosfer.az xəbər verir ki, hadisə iyulun 8-də, paytaxtın Moskva prospektində baş verib. Belə ki, 10-ZU-530 qeydiyyat nişanlı “Nissan” markalı avtomobilin sürücüsü 60 km/saat sürət təşkil olunmuş tuneldə yüksək sürətlə hərəkət edərək görüntünü qeydə alan avtomobildən yol istəyib. Videogörüntünü redaksiyamıza göndərən oxucu bildirir ki, asfalt üzərində bütöv xətt olduğu üçün sağ zolağa yerdəyişmə edə bilməyib. Sürətlə gələn sürücü bütöv xətti kəsərək sağdan ötmə edib. Daha sonra isə hərəkət sürətini aşaraq gözdən itib. Görüntüdən də aydın görünür ki,  sürücü nə qədər yüksək sürətlə hərəkət etsə də, sonda tıxacda qalıb. Videonu qeydə alan sürücü bu situasiyanı izah etməyə çalışsa da, o, buna əhəmiyyət verməyərək qarşıdakı sürücüləri sağdan ötüb və eyni hərəkətləri təkrarlamağa çalışıb.

Qeyd edək ki, yüksək sürətlə sürmək, sağdan-soldan ötərək tələskənlik etmək heç kimi 1 dəqiqə də olsun irəli salmır. Əksinə təhlükə ilə üzləşirlər və ya kimisə təhlükə altında qoyurlar. Eyni zamanda qəzaya düşərək ya ölürlər, ya da öldürürlər.

Fərid