Qayda pozan yaşlı qadın avtobus sürücüsünü “102” ilə təhdid etdi - VİDEO

Avtobus sürücüsünü cərimə təhlükəsiylə üz-üzə qoyan sərnişin qadın gərginlik yaradıb.

Avtosfer.az-ın məlumatına əsasən, xoşagəlməz hadisə “Bakubus” MMC-yə məxsus 44 nömrəli marşrut xətti üzrə hərəkət edən avtobusda qeydə alınıb.

Görüntüdən bəlli olduğu kimi, xanım və bir neçə kişi sərnişin sürücü ilə mübahisə edib. Gərginliyin yaranmasına səbəb xanım sərnişinin avtobusun qaydalarına zidd hərəkət etməsi olub.

Belə ki, avtobusun orta qapısından girərək oturan yaşlı qadına sürücü öndən minməsini və kartla gediş haqqını ödəməsini bildirib. Xanım isə sürücünün sözlərinə məhəl qoymayıb. Bu zaman sərnişinə yaxınlaşan sürücü bir daha xəbərdarlıq edərək aidiyyatı qurumların onu 60 manat məbləğində cərimə edəcəklərini vurğulayıb.

Qarşılığında yaşlı qadından təhqir və söyüş eşidən sürücü əsəbiləşərək mübahisə etməyə başlayıb. Vəziyyətdən xəbərdar olmayan bir neçə sərnişin isə sürücüyə təyziq göstərib. Həmçinin qadın yanlış hərəkət etdiyi halda “102-ni çağrın” deyərək sürücünü hədələyib.

Nərmin