"Yola sığmayan" sürücü avtomobilini səkiyə sığdırıb yolu kəsdi - VİDEO

Avtomobilini piyada səkisində park edən sürücü insanların hərəkətini çətinləşdirdi

Avtosfer.az xəbər verir ki, hadisə bu gün Mətbuat prospektində qeydə alınıb. Saytımızın kamerasından yan keçməyən görüntüdən bəlli olduğu kimi 10-AS-882 dövlət nömrə nişanlı, “Mercedes AMG” markasına məxsus avtomobilin sahibi mövcud səkinin piyadalar üçün nəzərdə tutulduğunu bildiyi halda avtomobilini həmin hissəyə parklayıb. Birbaşa maşın yoluna baxan səkinin “məşğul olması” oradan keçən insanların hərəkətini çətinləşdirib.

Bildirmək istərdik ki, səki - piyadaların hərəkəti üçün nəzərdə tutulan hissədir. Bu səbəbdən nəqliyyat vasitələri yalnız onların durması üçün ayrılmış, müəyyən edilmiş qaydada işarələnmiş parklanma yerlərində saxlanılmalıdır. Hətta səkilərin kənarında durmağa icazə verilən hallarda belə, piyadaların hərəkətinə mane olmamaq tələbi qoyulub.

Qeyd edək ki, mövcud proses "Yol hərəkəti" haqqında qanunun 52-ci maddəsi “Dayanma və durma” qaydaları ilə nizamlanır. İnzibati Xətalar Məcəlləsinə əsasən, bu əmələ görə sürücü 20 manat məbləğində cərimə oluna bilər.

 Nurlan Sakitoğlu