23 yaşlı oğlan qaçırdığı maşınla 2 nəfəri vurdu

Bakıda 23 yaşlı oğlan oğurladığı avtomobillə iki piyadanı vurub. Bakı Şəhər Baş Polis İdarəsindən Lent.az-a verilən xəbərə görə, iyunun 9-da Ucar rayon sakini Eldar Umbayev Naxçıvanski küçəsindən Röyal Abbaszadəyə məxsus “Opel” markalı avtomobili qaçırıb. E.Umbayev elə həmin gün sözügedən küçədə Bakı şəhər sakini 59 yaşlı Zöhrə Quliyevanı və Şamaxı rayon sakini 53 yaşlı Cavanşir Məmmədovu vuraraq avtomobili hadisə yerində qoyub qaçıb. Nəticədə, hər iki piyada aldıqları xəsarətlə 3 saylı xəstəxanaya yerləşdirilib. Yaralılar yardım alaraq evə buraxılıb. E.Umbayev isə iyunun 10-da könüllü olaraq Nizami Rayon Polis İdarəsinin 24-cü polis bölməsinə gələrək təslim olub.