Avtobus piyadanı vurdu – VİDEO

Bakıda ötən gecə avtobus sürücüsü tərəfindən törədilən dəhşətli qəza ilə bağlı təfərrüatlar məlum olub. Avtosfer.az xəbər verir ki, bu barədə Sabunçu Rayon Polis İdarəsindən milli.az-a verilən məlumata görə, dünən saat 22 radələrində 58 yaşlı Rasim Quliyev idarə etdiyi "Daewoo" markalı, 99 JA 309 dövlət nömrə nişanlı avtobusla yolu keçmək istəyən 44 yaşlı Reyhan Nurullayevanı vurub. Piyada aldığı xəsarətdən yerindəcə keçinib. Qəza avtobus yoldakı dairəyə yaxınlaşarkən baş verib. Qəzadan sonra piyada zərbədən bir neçə metr kənara, yol kənarına düşüb. Burada piyadanın günahı olub, o,  qadağan olunmuş və təhlükəli ərazidə, özü də qaranlıq vaxtı yol keçib. Dəhşətlisi odur ki, dairənin bir addımlığında baş verən qəzada avtobusun yüksək sürətlə hərəkəti inkarolunmazdır. Əgər avtobus dairəyə yaxınlaşarkən əyləci basmış və ya sürətini azaltmış olsaydı, piyada zərbədən sonra yol kənarına düşməzdi. Çünki dairəyə daxil olan avtobus heç cür qadının canını tapşırdığı yerdən keçə bilməz. Keçirsə, bunun özü avtobus sürücüsünün kobud qayda pozuntusudur. Onu da əlavə edək ki, qəzanın baş verdiyi Yavər Əliyev küçəsi yaşayış məntəqəsindən  keçir və orada avtomobillərin sürəti saat 60 kilometrdir.