Azərbaycanda 35 min manatlıq maşınını yandırdılar – FOTO

Sentyabrın 1-də 04:30 radələrində Xətai rayonunda yanğın hadisəsi baş verib. "Pluton" şadlıq sarayının yaxınlığında həyətlərin birində saxlanmış və şəhər sakini Məzahir Həsənova məxsus “Mersedec GL” markalı avtomobil yanıb. Fövqəladə Hallar Nazirliyinin məlumatına görə, avtomobilin yanar hissələri yanıb.

Zərərçəkənin sözlərinə görə, hadisə qəsdən törədilib: “Polislər araşdırma aparır. Ancaq mən fikirləşirəm ki, hadisə qəsdən törədilib. Çünki yanğından sonra maşının yanında 2 pivə şüşəsi var idi”. 

Məzahir Həsənov yanğın zamanı avtomobilin sənədlərinin, sürücülük vəsiqəsinin yandığını da bildirib. Dəymiş ziyan təxminən 35 min manatdır. O qeyd edib ki, avtomobilin könüllü sığortası olmayıb: “Heç kim başına belə hadisənin gələcəyini bilmir. Əlbəttə, bilsəydim, sığortalayardım”.

“Alfa sığorta” şirkətinin hadisələr departamentinin direktoru Feyruz Novruzov fins.az-a bildirib ki, “Mersedes GL” markalı avtomobili bazar qiymətinə uyğun olaraq  bir il üçün 1000 manata sığortalamaq olardı. Baş verən hadisədə tam məhvolma halı olduğu üçün zərərçəkən vətəndaş 35 min manat sığorta ödənişi ala bilərdi.