Çində helikopter qəzası - Ölən və yaralananlar var

Çinin şərqində yerləşən Szyansu əyalətinin Suçjou şəhərində baş vermiş helikopter qəzası nəticəsində azı bir nəfər həlak olub, daha dörd nəfər xəsarət alıb.

Avtosfer.az xəbər verir ki, bu barədə “Sinxua” agentliyi məlumat yayıb.

Bildirilib ki, “Robinson R44 II” tipli helikopterin pilotu eniş zamanı idarəetməni itirib və hava nəqliyyatı vasitəsi təxminən 10 metr hündürlükdən yerə çırpılıb. Hadisə nəticəsində helikopterdə olan dörd nəfər müxtəlif dərəcəli bədən xəsarətləri alıb. Qəza zamanı yerdə olan bir nəfər isə həyatını itirib.

Yaralılar dərhal xəstəxanaya çatdırılıb və onların həyatına təhlükə olmadığı bildirilir.

Hazırda əyalətin mülki aviasiya idarəsi qəzanın səbəblərini araşdırır.