Dəhşətli qəzada yaralanan daha 2 yaralı öldü

Martın 19-da Kürdəmirdə baş verən yol qəzasında xəsarət alanlardan daha 2 nəfər dünyasını dəyişib. Avtosfer.az APA-ya istinadən bildirir ki, ağır xəsarətlərlə Kürdəmir Mərkəzi Rayon xəstəxanasına yerləşdirilən Şəmkir rayon sakini, “VAZ” markalı maşının sürücüsü, 54 yaşlı Qəhrəmanov Qəhrəman İlyas oğlu və onun həmyerlisi 24 yaşlı Qəhrəmanova Arzu Qəhrəman qızı xəstəxanada dünyasını dəyişiblər. Digər yaralılar - 20 yaşlı Məmmədova Nəsibə Zaman qızı müalicə olunmaq üçün Bakıya aparılıb. 27 yaşlı Qəhrəmanova Gülnar Şahəddin qızının vəziyyəti isə normal olduğundan evə buraxılıb. Hadisə yerində ölənin isə 23 yaşlı Hüseynova Nüşabə Zaman qızı olduğu məlum olub.

Qeyd edək ki, martın 19-da günorta saatlarında Bakı-Qazax əsas magistral yolunun 207-ci kilometrliyinin Kürdəmir rayonunun Qarabucaq kəndindən keçən hissəsində yol qəzası baş verib. Bakı istiqamətində hərəkətdə olan, Qazax rayon sakini Cavid Hüseynovun idarə etdiyi “Mercedes” markalı avtomobillə Qazax istiqamətində hərəkət edən, Şəmkir rayon sakini Əbülfəz Əliyevin idarə etdiyi “Mercedes Vita” markalı sərnişin mikroavtobusu qarşı-qarşıya gəlib. Avtomobillər bir-birinə toxunsa da C. Hüseynov avtomobili yolun kənarına çəkə bilib. Bu zaman onun arxasınca gələn “VAZ-2107” markalı minik avtomobili ilə Ə. Əliyevin idarə etdiyi sərnişin mikroavtobusu toqquşub.

Nəticədə “VAZ” markalı maşında olan 1 nəfər dünyasını dəyişib, 4 nəfər isə müxtəlif bədən xəsarətləri ilə Kürdəmir Mərkəzi Rayon xəstəxanasına yerləşdirilib.

Hadisənin dəqiq baş vermə səbəbi Baş Dövlət Yol Polisinin İstintaq və Təhqiqat şöbəsində araşdırılır.