Məhkəmə hakimi qəza törətdi - FOTOLAR

Gəncə Apelyasiya Məhkəməsinin hakimi qəza törədib. Avtosfer.az-ın "Kəpəz TV"yə istinadən verdiyi məlumata görə, bu gün saat 16:00 radələrində Gəncə-Bakı avtomagistralının Nizami məqbərəsi yaxınlığında bir nəfərin xəsarət alması ilə nəticələnən yol-nəqliyyat hadisəsi baş verib. Gəncə Apelyasiya Məhkəməsinin hakimi Azər Bayramov idarə etdiyi “Volkswagen Touareg” markalı avtomobillə hərəkətdə olarkən sürücüsünün kimliyi hələlik məlum olmayan “VAZ-2107” markalı avtomobillə toqquşub. Qəza nəticəsində "VAZ"-ın sərnişini, 18 yaşlı Günel Bayramova Gəncə şəhər TTYX-nin travmatologiya şöbəsinə yerləşdirilib. Xəstəxananın həkimi Mehman Hüseynovun verdiyi məlumata görə, hazırda xəstənin vəziyyəti normaldır.

Faktla bağlı Gəncə Şəhər Baş Polis İdarəsində araşdırma aparılır.