Qar fırtınası kütləvi qəzaya SƏBƏB OLDU: 95 maşın toqquşdu, 11 yaralı – FOTO - VİDEO

Qazaxıstan-Rusiya sərhədində, Astana-Petropavlovsk avtomobil yolunda 95 avtomobilin iştirakı ilə zəncirvari qəza baş verib.

Avtosfer.az yerli mediaya istinadən xəbər verir ki, toqquşma nəticəsində 11 nəfər müxtəlif dərəcəli bədən xəsarətləri alıb. Yaralılar Bulandın rayon xəstəxanasına müraciət edib, onlardan dördü xəstəxanaya yerləşdirilib.

Regional fövqəladə hallar departamenti əhalini yaşayış məntəqələrindən kənara çıxmamağa çağırıb.

Həmçinin hadisə yerindən yayılan görüntülərdə 200-dən çox avtomobildən ibarət karvanın qar fırtınası şəraitində Astana-Şuçinsk yolu ilə paytaxta doğru hərəkət etdiyi bildirilir. Onları polis maşınları və Fövqəladə Hallar Nazirliyinin əməkdaşları müşayiət edirlər.