Salyanda AĞIR QƏZA: Ölən və yaralanan var - YENİLƏNİB

Salyan rayonunda baş verən yol-nəqliyyat hadisəsi zamanı xəsarət alan sürücünün vəziyyəti açıqlanıb.

Salyan Rayon Mərkəzi Xəstəxanasından verilən məlumatda bildirilir ki, baş verən yol-nəqliyyat hadisəsi ilə əlaqədar 2007-ci il təvəllüdlü şəxs (kişi) xəstəxananın Təcili tibbi yardım şöbəsinə 11.03.2026-cı il tarixində saat 00:30-da hospitalizasiya olunub.

Ona başın təpə nahiyəsinin, sağ qulağın açıq yarası, döş qəfəsinin səthi travması, sağ diz qapağının çıxığı və üzün əzilməsi diaqnozları təyin edilib və zəruri tibbi xidmətlər göstərilib.

Ailə üzvləri tərəfindən pasiyentin digər tibb müəssisəsinə aparılacağı bildirildiyindən, o, öz istəyi əsasında tibb müəssisəsindən buraxılıb./oxu.az

***09:24

Salyanda yol-nəqliyyat hadisəsi baş verib.

Avtosfer.az "Report"a istinadən xəbər verir ki, hadisə Ələt-Astara magistralının rayonun Şörsulu kəndi ərazisindən keçən hissəsində qeydə alınıb.

Belə ki, hadisə zamanı KIA markalı avtomobil anidən idarəetmədən çıxaraq aşıb.

Qəza nəticəsində Goranboy rayon sakini 1994-cü il təvəllüdlü Namaz Qurban oğlu Babayev hadisə yerində ölüb. 2007-ci il təvəllüdlü Nahid Sadiq oğlu Orucsoy müxtəlif dərəcəli xəsarətlər alıb.

Yaralı Salyan Rayon Mərkəzi Xəstəxanasına çatdırılıb. İlkin tibbi yardım aldıqdan sonra vəziyyəti ağır olduğundan Bakıdakı xəstəxanalardan birinə göndərilib.

Faktla bağlı araşdırma aparılır.