Salyanda «Kamaz» qoyunları biçdi

Salyanda baş verən yol qəzasında çoxlu sayda xırdabuynuzlu heyvan tələf olub. Avtosfer.az xəbər verir ki, APA-ya Baş Dövlət Yol Polis İdarəsindən verilən məlumata görə, axşam radələrində Ələt-Astara magistral yolunun 77-ci kilometrliyində Salyan rayonunun Dayıkənd kəndi ərazisində qeydə alınıb. Qaradağ rayonunun Qobustan qəsəbəsinin sakini Rəcəb Nəbiyevin idarə etdiyi  "Kamaz" markalı yük maşını Bakı istiqamətində hərəkətdə olarkən örüşdən qayıdan qoyun sürüsü qarşısına çıxıb. Nəticədə Dayıkənd sakini,  Elxan Bəşirovun təsərrüfatına məxsus 12 baş qoyun tələf olub, 2-si isə yaralanıb, ümumilikdə 3 min manata yaxın maddi ziyan dəyib. Faktla bağlı Baş Dövlət Yol Polisi İdarəsinin istintaq və təhqiqat şöbəsində araşdırma aparılır.