Təyyarə qəzaya uğrayaraq yaşayış binalarına çırpılıb

ABŞ-nin Kaliforniya ştatının Simi-Velli şəhərində təyyarə Vud-Ranç ərazisindəki yaşayış binalarının üzərinə düşüb.

Avtosfer.az xəbər verir ki, bu barədə “ABC News” məlumat yayıb.

Məlumata görə, qəzaya uğrayan “Vans RV-10” şəxsi mülkiyyətdədir və əldəqayırma hissələrdən yığılıb. Hadisə nəticəsində iki evə ziyan dəyib, yanğın başlayıb.

Federal Aviasiya Administrasiyasının məlumatına görə, təyyarənin yeganə sərnişini şəxsiyyəti hələ məlum olmayan pilotdur. Hadisə yerinə 40-a yaxın yanğınsöndürən göndərilib. Ventura dairəsinin Yanğınsöndürmə Xidmətinin İctimai İnformasiya əməkdaşı Endryu Daud bildirib ki, evlərin içərisində heç kim xəsarət almayıb.

Federal Aviasiya Administrasiyası (FAA) bildirib ki, təyyarə Lankasterdəki Uilyam J.Foks aerodromundan havaya qalxıb və Kamarilyo hava limanına istiqamət alıb.