Yuxulu sürücü qəza törətdi, bir ailədən 4 nəfər yaralandı

Bakı-Qazax yolunda baş verən yol qəzasında bir ailənin 4 üzvü ağır xəsarətlər alıb. Ötən axşam Bakı-Qazax yolunun 103-cü kilometrliyində Hacıqabul rayonunun Nəvahi kəndi ərazisində 29 yaşlı Teymurov Elçin Nüsrət oğlunun idarə etdiyi “Mercedes” markalı avtomobil qarşıda hərəkətdə olan “KamAZ” markalı avtomobilə çırpılıb. Nəticədə minik maşınında olan bir ailənin üzvləri - 22 yaşlı Kərimova Günay Nüsrət qızı qapalı kəllə-beyn travması və alt çənə sümüyünün sınığı, 24 yaşlı Teymurova Elnurə Ramiz qızı qapalı kəllə-beyin travması diaqnozları ilə Şirvan mərkəzi rayon xəstəxanasının reanimasiya şöbəsinə, 30 yaşlı Həsənova Aygün Nüsrət qızı isə kəllə-beyn travması diaqnozu ilə travmatologiya şöbəsinə yerləşdirilib. Sürücüyə ambulator yardım göstərildikdən sonra evə buraxılıb. Xəsarətləri nisbətən ağır olan Günay Kərimova sonradan Bakıdakı travmatologiya mərkəzinə aparılıb. APA TV-nin xəbərinə görə, qəzanın baş verməsinə sürücünün sükan arxasında yuxulamasının səbəb olduğu bildirilir. Faktla bağlı BDYPİ-də araşdırma aparılır.