DİN-dən dəhşətli qəza barədə açıqlama - “Rəisin günahı yoxdur”

“Sentyabrın 13-də axşam saatlarında Qəbələdə “VAZ 2107” markalı avtomobilin ağır qəza törətməsinin günahkarı yol polisi xidmətinin rəisi Fariz Həsənov və onun müavini Aydın Heydərov deyil”. Avtosfer.az xəbər verir ki, bunu aznews.az-a açıqlamasında Daxili İşlər Nazirliyinin mətbuat xidmətinin şöbə rəisi Orxan Mansurzadə deyib. O bildirib ki, hadisənin baş verməsinə səbəb sürücünün avtomobili içkili halda idarə etməsi və yol hərəkəti qaydalarını kobud surətdə pozması olub: “Hadisənin baş verməsi polislərin onları təqib etməsi ilə bağlı deyil. Səbəb həmin sürücünün içkili halda avtomobili idarə etməsi, yol hərəkəti qanunlarını pozmasıdır. Avtomobilin sürücüsü polislərin saxla əmrinə tabe olmayaraq, hərəkətin əks istiqamətinə çıxaraq başqa avtomobillə toqquşub. Burada polislərin heç bir günahı yoxdur”. Orxan Mansurzadə qəzadan sonra polislərin hadisə yerindən qaçması barədə deyilənləri də əsassız sayır: 

“Qəza baş verdikdən sonra polislər hadisə yerinə təcili tibbi yardım maşınlarını və Fövqəladə Hallar Nazirliyinin əməkdaşlarını çağırıblar. Hətta xəsarət alanların xəstəxanaya yerləşdirilməsi prosesində də iştirak ediblər. Ona görə də, polislərin hadisə yerindən qaçmaları barədə deyilənlərin heç bir əasası yoxdur”.

Qeyd edək ki, zərərçəkənlərin qardaşı İldırım Səmədov hadisənin baş verməsinə səbəb kimi yol polislərinin onları təqib etməsinin olduğunu deyib. Elə buna görə də, xəsarət alanların qohumları Qəbələ rayonunun yol polis xidmətinin rəisi Fariz Həsənov və onun müavini Aydın Heydərovla bağlı aidiyyəti qurumlara müraciət ediblər. Hadisə zamanı hər iki avtomobildəki sərnişinlərin biri hadisə yerində keçinib, digərləri isə ağır yalanıb və təcili Qəbələ Mərkəzi Xəstəxanasına yerləşdirilib. Xəsarət alanların 3-nün vəziyyəti çox ağır olduğundan onları Bakıya gətiriblər.