DYP-dən təkər xəbərdarlığı

Qış mövsümü ilə əlaqədar olaraq Türkiyədə qış şininə keçməyən şəhərlərarası sərnişin və yük avtomobillərinə qarşı 500 lirədən çox cərimə cəzasının tətbiqinə start verilib. Maraqlıdır, Azərbaycanda necə, şəhərlərarası və ya şəhərdaxili sərnişin, yaxud yük avtomobilləri ilə bağlı qanunvericilikdə bu cür cərimə cəzası nəzərdə tutulubmu? Bununla bağlı moderator.az-a açıqlama verən Baş DövlətYol Polis İdarəsinin şöbə rəisi Kamran Əliyev Azərbaycan qanunvericiliyində tələblərin bir qədər fərqli olduğunu bildirdi: “Azərbaycan qanunvericiliyində elə bir məsuliyyət nəzərdə tutulmayıb. Amma qanunda nəqliyyat vasitələrində, xüsusilə də avtobuslarda, minik avtomobilində hər bir avtomobilin təyinatından asılı olaraq şinlərin minimum qalınlığı göstərilir. Əgər nəqliyyat vasitələrinin şinləri qanunvericiliklə nəzərdə tutulmuş tələblərə uyğun gəlməzsə, o halda həmin nəqliyyat vasitəsinin istismarı qadağan olunur, sürücülər isə məsuliyyətə cəlb olunur”.