İki nəfəri öldürən sürücü azadlığa buraxıldı

Bakıda iki nəfərin ölümünə səbəb olan sürücü azadlığa buraxılıb. Avtosfer.az Trend-də istinadən xəbər verir ki, məhkəmənin qərarı ilə Qaradağ rayonunda iki nəfərin ölməsi, bir nəfərin xəsarət alması ilə nəticələnən yol qəzasını törətmiş sürücü azadlığa buraxılıb.

Qeyd edək ki, yanvarın ortalarında Qaradağ rayonunda iki nəfərin ölməsi, bir nəfərin xəsarət alması ilə nəticələnən yol qəzasını törətmiş sürücü barəsində həbs qətimkan tədbiri seçilmişdi.

Yanvarın 9-da saat 09 radələrində Cabbarov Yasin Çərkəz oğlu idarə etdiyi “Nexia” markalı 25-BE-270 dövlət nömrə nişanlı avtomobillə Bakının Qaradağ rayonu ərazisində, Bakı-Salyan yolunun 14-cü km-də Bakı şəhəri istiqamətində hərəkətdə olarkən idarə etdiyi avtomobili yolun sağ kənarında quraşdırılmış dəmir yolayrıcına vurub. Nəticədə avtomaşında olan sərnişinlər Sadıqov Altay Elman oğlu və Hacıyeva Yasəmən Talıb qızı aldıqları bədən xəsarətlərindən hadisə yerində ölüb, avtomobildə olan digər sərnişin Bayramova Həcər Faiq qızı isə müxtəlif dərəcəli bədən xəsarətləri alaraq xəstəxanaya yerləşdirilib.

Faktla bağlı Qaradağ rayon Polis İdarəsinin İstintaq şöbəsində Cinayət Məcəlləsinin 263.3-cü (Yol hərəkəti və nəqliyyat vasitələrinin istismarı qaydalarını pozma iki və daha çox şəxsin ölümünə səbəb olduqda) maddəsi ilə cinayət işi başlanıb.

Y.Cabbarov təqsirləndirilən şəxs qismində cəlb olunaraq məhkəmənin qərarı ilə barəsində həbs qətimkan tədbiri seçilib.