Kamran Əliyev sürücülərin etirazından danışdı

Dünən bir qrup sürücünün Bakı Beynəlxalq Avtovağzalında aksiya keçirdiyi, avtovağzala girişi müvəqqəti bağladığından bəhs etmişdik. Bu gün moderator.az-la əlaqə saxlayan Baş Dövlət Yol Polis İdarəsinin ictimaiyyətlə əlaqələr şöbəsinin rəisi, polis polkovniki Kamran Əliyev avtovağzala girişin bağlanmadığını, əraziyə Çevik Polis Alayının əməkdaşlarının cəlb edilmədiyini bildirib. Onun sözlərinə görə, dünən sadəcə avtovağzal rəhbərliyi ilə birlikdə sürücülərə izahat verilib: “Nazirlər Kabinetinin 141 nömrəli qərarı, yəni avtomobil nəqliyyatı ilə sərnişin daşınması qaydaları mövcuddur. Həmin qaydalara uyğun olaraq uzunluğu 150 km-dən artıq olan şəhərlərarası, rayonlararası və beynəlxalq marşurutlarda oturacaq sayı 23-dən az olan avtobusların müntəzəm sərnişin daşınmasının yerinə yetirilməsinə yol verilmir. Bu da həmin avtovağzaldan rayonlara işləyən sürücülərin diqqətinə çatdırılıb. Onlara müvafiq sənədlərin alınması ilə bağlı bir ay bundan öncə xəbərdarlıq olunub. Dünən bir daha bununla bağlı sürücülərə xatırlatma olundu. Həmin nəqliyyat vasitələri yalnız konkret olaraq sənədləri qaydasında olandan sonra, bu fəaliyyətlə məşğul olmaq üçün xüsusi lisenziya əldə etdikdən sonra bununla məşğul ola bilərlər.

Bu daşımalar ancaq avtovağzaldan avtovağzala təşkil ediləcək. Sürücülərə avtovağzal rəhbərliyinin də iştirakı ilə izahat verildi. Onlar məlumatlandırılıblar və dağılışıb gediblər. Yazıda isə qeyd edilir ki, guya sürücülər yığışıb yolu bağlayıblar, əraziyə Çevik Polis Alayının əməkdaşları cəlb olunub və s. Bunlar həqiqətə uyğun məlumatlar deyil. Qanunvericilikdə nə nəzərdə tutulursa, sərnişindaşıma ilə məşğul olan həm hüquqi, həm fiziki, həm də vəzifəli şəxslər buna əməl etməlidir.

Bütün bu görülən işlər sərnişinlərin həyat və sağlamlığının qorunmasına yönəlik addımlardır. Kimsə istəməz ki, yol qəzasında hansısa ailə üzvünü itirsin. Buna görə də məlum sahədə ciddi nəzarət tətbiq ediləcək”.