Ramil Usubov yol polisinə görə məhkəməyə üz tutdu

Yol polisi 27 Avqust 2014 14:37 Oxunub 3449
Ramil Usubov yol polisinə görə məhkəməyə üz tutdu
WhatsApp kanalımıza abunə ola bilərsiniz
Nazir DYP əleyhinə danışan Eldəniz Quliyevi məhkəməyə verib

Daxili işlər naziri Ramil Usubov Ziyalılar Birliyinin sədri, Milli Şuranın Koordinasiya Mərkəzinin üzvü Eldəniz Quliyevi məhkəməyə verib. Bu barədə “Azadlıq” qəzeti xəbər yayıb. R.Usubov Eldəniz Quliyevlə bağlı Nəsimi Rayon Məhkəməsində xüsusi ittiham qaydasında iddia qaldırıb. R.Usubov iddiasında E.Quliyevin Cinayət Məcəlləsinin 147 (təhqir) və 148-ci (böhtan) maddələri ilə cəzalandırılmasını xahiş edib.

 

Daxili İşlər Nazirliyinin mətbuat xidmətinin rəis müavini Ehsan Zahidov bildirib ki, bir neçə gün öncə E.Quliyev daxili işlər nazirinə mətbuat vasitəsiylə müraciət edib: “Müraciətində hansısa yol polisi əməkdaşının hərəkətindən gileylənirdi. Eldəniz Quliyev həmin mətnin dörd-beş yerində ümumən Azərbaycan polisinin ünvanına təhqiramiz ifadələr işlədib, onun şərəf və ləyaqətini çox kobud şəkildə alçaldıb. Onun işgüzar nüfuzunu gözdən salmaq üçün müxtəlif ifadələr yer alıb. Bizim ona cavabımız da olmuşdu. Ancaq həmin müraciətdən dərhal sonra respublikanın çoxsaylı polis əməkdaşları Daxili İşlər Nazirliyinin rəhbərliyinə həmin şəxsin məhkəməyə verilməsini və bununla da məsələnin hüquqi müstəvidə həll edilməsini xahiş ediblər. Çoxsaylı şikayətlər nəzərə alınıb və sənədlər toplanaraq Cinayət Məcəlləsinin 147 və 148-ci maddələriylə xüsusi ittiham qaydasında məhkəməyə müraciət olunub”.

E.Quliyev isə məsələyə bu cür münasibət bildirib: “Polis mundiri rəmzləri daşımaq üçün deyil, o eyni zamanda asayişi pozanlardan fərqlənmək üçün geyinilir”.

 

Qeyd edək ki, Eldəniz Quliyev bir neçə gün öncə mətbuatda daxili işlər naziri R.Usubova müraciət ünvanlayıb. Müraciətdə bəzi yol polisi əməkdaşlarının öz vəzifə səlahiyyətlərindən sui-istifadə etdiyinə diqqət çəkən E.Quliyev R.Usubovu məlum problemin həlli istiqamətində konkret addımlar atmağa səsləmişdi.

ŞƏRH YAZ
Ad

E-mail

Şərh