Rüşvət üstündə həbs xəbəri yayılan yol polisi danışdı

İki gün öncə “avtoşdan” rüşvət aldığına görə həbs olunması xəbəri yayılan yol polisi hazırda iş başındadır. AzNews.az-ın əldə etdiyi məlumata görə, Nəsimi rayon Polis İdarəsinin Dövlət Yol Polisi Şöbəsinin (DYPŞ) əməkdaşı Rəşad Nağıyev gözlənilmədən öz postuna qaytarılıb. Xəbəri dəqiqləşdirməkdən ötrü aznews.az-ın əməkdaşı təqsirli bilinənən şəxsin özü - Rəşad Nağıyevlə əlaqə saxlayıb. O, həqiqətən də işə çıxdığını təsdiqləyib. Rəşad Nağıyev bildirib ki, barəsində yayılan xəbərlər doğru deyil: “Yalan söhbətdi. Mən məzuniyyətə getmişdim. Sonra bildim ki, mənim barədə belə məlumat yayılıb. Heç biri doğru deyil. Yalnış məlumatdır. Nəsə anlaşılmazlıq olub”.

Xatırladaq ki, Nəsimi rayon Polis İdarəsinin Dövlət Yol Polisi Şöbəsinin (DYPŞ) inspektoru Rəşad Nağıyev vəzifə səlahiyyətlərini aşaraq, rüşvət alarkən «iş başında» yaxalanıb. Avtosfer.az saytının yaydığı məlumata görə, avtoxuliqanlıq əməlinə görə saxlanılan sürücüdən 500 manat rüşvət istəyib. Sürücü bu barədə hüquq-mühafizə orqanlarına məlumat verib və əməliyyat planı hazırlanıb. Əməliyyat nəticəsində R.Nağıyev həmin sürücüdən rüşvət alarkən iş otağında həbs olunub.