Sərnişin bıçaqla yol polislərinə hücum etdi

Martın 1-də Bərdə rayonunda polisə qarşı müqavimət faktı qeydə alınıb. Avtosfer.az xəbər verir ki, lent.az-ın hüquq-mühafizə orqanlarından əldə etdiyi məlumata görə, saat 01 radələrində Bərdə rayon Polis Şöbəsinin Dövlət Yol Polisi Bölməsinin yol patrul xidməti inspektorları Əliyev Ülfət Əli oğlu, İsgəndərov Şərif Şəmsəddin oğlu, Qasımov Vasif Elman oğlu  Bərdə şəhəri İ.Qayıbov küçəsində xidmətdə olarkən “VAZ 21074” markalı, 90-HA-227 dövlət qeydiyyat nişanlı avtomaşın yolun qarşı hərəkət zolağına çıxdığı üçün ona saxla işarəsi verib. Lakin sürücü tabeçilik göstərməyərək hərəkətini davam etdirib və yaxınlıqdakı tikilinin həyətinə daxil olaraq avtomaşını saxlayıb. Polis əməkdaşları sürücü Mehdizadə  Elgiz Dadaş oğluna yaxınlaşaraq sənədlərini təqdim etməsini istəyib. Bu zaman avtomobilin qabaq oturacağında oturan sərnişin Şirinov Hünər Əli oğlu avtomaşından düşərək polis əməkdaşları ilə mübahisə edib. O, hətta cibindəki bıçağı çıxararaq polis əməkdaşlarına hücum edib. Bildirilir ki, polis əməkdaşları H.Şirinovdan ərazidən uzaqlaşmasını tələb ediblər və sürücü Elgiz Mehdizadəni həkim müayinəsinə aparmaq istəyiblər. Lakin tabeçilik göstərməyən H.Şirinov əllərindəki bıçaqla yol polisinin “BMW” markalı xidməti avtomaşının sağ qabaq və arxa şinlərini deşib. Faktla bağlı araşdırmalar aparılır.