«Yol polisi günahımı sübut etmədən 45 manat cərimə istəyir»

Bakı şəhəri, Qaradağ rayon sakini Bayramov Fərid Eldar Ağlu Avtosfer.az saytına yol polisinin fəaliyyəti ilə bağlı müraciət edib. O, biddirir ki, iyulun 7-də Quba rayonundan Bakıya gələrkən yol polisi əməkdaşları onu saxlayıb və piyadaya yol verməməklə bağlı protokol tərtib ediblər: «Qəbrstanlıq tərəfdə piyada keçidi var (nizamlanmayan) gördüm ki, piyada zolağa daxil olub yolu keçir, surəti aşağı saldim tamam və qəza işıqlarını yandırdim ki, arxadan gələn maşınlar bilsin. Piyada yolu keçib gedəndən sonra mən sürdüm. Elə bu vaxt mən artıq xəttin üstəndə olanda, yəni, artıq zolağa daxil olanda yan tərəfdən bir piyada yola girdi. Ehtiyat üçün sükanı yenə sola tərəf döndərib keçdim. Çünki orada başqa edəsi heç nə yox idi. Ya gərək xəttin üstündə dayanıb maşını geriyə sürüm, ya da kecib gedim. Mən süren kimi qarşıdakı «BMW»-də əyləşən yol polisləri saxladı. İnspektor mənə bildirdi ki, piyadanın birinə qəza işığını yandırıb yol verdin, amma o birinə yox. Mən də izah elədim ki, əgər mən yol verməyən idimsə heç o birinciyə də yol verməzdim, yanından keçib gedərdim. Amma mən gözlədim, o keçdi qutardı, sonra sürdüm. Axırda polis protokol yazdı. Mən də protokolda qeyd etdim ki, razi deyiləm. Onlar da dedi ki, onda sənə zəng olunacaq və DYP-də sənin öz iştirakınla kamera görüntülərinə baxılacaq. Ondan sonra qərar qüvvəyə minəcək».

Sürücü bildirir ki, üstündən iki ay keçəndən sonra ötən həftənin şənbə günü ona məktub gəlib və Qardağ rayon Dövlət Yol Polisinə Şöbəsinə dəvət olunub: «Bildirişdə yazılıb ki, DYP-də birlikdə görüntüyə baxılıb sübuta yetiriləcək. Mən də bu gün getdim. Amma məlum oldu ki, nə video materal var, nə də foto. Sadəcə protocol var. Orada rəislə görüşdüm, bildirdi ki, gəl, protokolu yazaq, sənə də rahat olsun, 3 gün ərzində 45 manat ödəyərsən. Mən də dedim, xeyr, razı deyiləm, istəyirəm ki, əvvəlcə törətdiyim xəta sübut olunsun. Rəis də cavabında bildirdi ki, onda biz səni yenə çağıracağıq. Amma bir şey var ki, sənin xətan sübut olunsa protokul yazıldığı gündən qüvvəyə minəcək, sən isə dəbbə pulunu da ödəməli olacaqsan. Yəni, onun dediyindən belə çıxdı ki, mən iki aylıq faiz də ödəməli olacam».

Yol hərəkəti üzrə ekspet Ərşad Hüseynov sürücünün Avtosfer.az-a etdiyi müraciətlə bağlı bildirib ki, qanunun tələbinə əsasən Fərid Bayramovun şikayətinə onun iştirakı ilə baxılmalı idi: «Əgər qayda pozuntusu sübut olunsa, cərimə barədə qərar çıxarılmalıydı, əksinə, qayda pozuntusu yoxdursa, icraata xitam verilməlidir. Özü də qərar çıxarsa, geriyə qüvvədən söhbət gedə bilməz və hər hansı peniya-filan mümkün deyil. Qərar vətandaşa təqdim edildikdən sonra qüvvəyə minir».

Emin