Yol polisindən çağırış: "Şəxsi avtomobillərdən az istifadə edin"

Bakı yol polisi sabah Avropa Oyunlarının bir gününü canlandırmaqla, ilk Oyunlar zamanı əməliyyatlara hazırlığın sınaqdan keçiriləcəyi ilə əlaqədar sürücülərə şəxsi avtomobillərdən az istifadə etməyi tövsiyə edir. Bakı Şəhər Dövlət Yol Polisi İdarəsinin bölmə rəisi Vaqif Əsədov bildirib ki, mayın 17-də Avropa Oyunlarında müxtəlif idman növləri üzrə keçirilən yarışlar istiqamətində avtomobillərin hərəkəti ilə bağlı təlim məşqlərinin keçirilməsi nəzərdə tutulur. Bölmə rəisi qeyd edib ki, yol polisi paytaxt sakinlərinə, sürücülərə qeyd edilmiş marşrutlar üzrə çəkilmiş Avropa Oyunları xətləri boyunca Oyunlar üçün ayrılmış avtomobillərin rahat və təhlükəsiz hərəkətini təmin etmək üçün şəxsi avtomobillərdən az istifadə etməyi xahiş edir: "Yəni metronun "Koroğlu" stansiyasının yanından - Atletlər kəndindən Ziya Bünaydov prospekti boyunca, "20 Yanvar" dairəsi, "Şamaxinka"dan keçməklə Biləcəri enişi, Avtovağzal ərazisi, Stend Atıcılığı İdman Kompleksinin ərazisindən keçməklə 3-cü kənar dairəvi yolla Bakı-Salyan yolunun 14-cü kilometrliyi və həmin yolla Bayraq meydanı, Azneft dairəsi, Atatürk prospektindən metronun "Gənclik" stansiyası istiqamətinə, Tbilisi prospektində təlimlər keçiriləcək və bu marşrutlar üzrə şəxsi avtomobillərdən mümkün qədər az istifadə edilməsi tövsiyə olunur".

Nəqliyyat Nazirliyi və Bakının nəqliyyat infrastrukturuna cavabdeh digər qurumlarla birgə təşkil olunan simulyasiya tədbiri altı saat ərzində - 08:00-dan 14:00-a qədər davam edəcək.

Nəqliyyatın hərəkətinin məhdudlaşdırılması halı nəzərdə tutulmasa da, yollarda avtobus, taksi və mikroavtobusların sayı artacaq. Bu, iyunun 12-də start götürəcək ilk Avropa Oyunları üçün Bakı 2015-in hazırladığı əməliyyat proqramlarının sınaqdan çıxarılması ilə bağlıdır.

Baş Dövlət Yol Polisi İdarəsi də bildirir ki, mayın 17-də saat 08:00-dan 14:00-dək Bakı 2015 Avropa Oyunlarının bir gününü canlandırmaqla Oyunlar zamanı əməliyyatlara hazırlıq sınağı keçiriləcək. Bu səbəbdən yollarda hərəkətin təhlükəsizliyinin təmin olunması məqsədi ilə paytaxt sakinlərindən xahiş olunur ki, qeyd olunan müddət ərzində fərdi minik avtomobillərindən mümükün qədər az istifadə olunsun, ictimai nəqliyyat vasitələrindən istifadəyə üstünlük verilsin. “Müraciətimizə sayğı və məsuliyyətlə yanaşdığınıza görə əvvəlcədən təşəkkür edirik” – DYP bildirir.

Elmin