Yol polisindən motosikletin üstündə rəqs edən sürücüyə maraqlı təklif - VİDEO

Paytaxt küçələrində yüksək sürətlə hərəkət edən motosikletin sürücüsü ayaq üstə rəqs edir. Eyni anda bir neçə qaydanı pozan sürücü həm özünü, həm də digər yol hərəkəti iştirakçılarını təhlükəyə atır. Bakı şəhər Dövlət Yol Polisi İdarəsinin sözcüsü Vaqif Əsədov isə Avtosfer.az saytında yayılan kadrların dirnaqarası qəhrəmanına maraqli bir təklif irəli sürüb.

Şəxsiyyəti hələlik məlum olmayan motosikletçi eyni anda bir neçə qaydanı pozur. Kadrlardan aydın görünür ki, sürücü bu hərəkətlə həm öz həyatını, həm də digər avtomobillərdə olanları təhlükəyə atır.

Ekspert bildirir ki, belə hallarda qəza olsa motosiklet sürücüsünün ağır xəsarətlər alması qaçılmazdır.

Yol hərəkəti qaydalarını kobut şəkildə pozan sürücü müəyyən edilərsə qanunun bir neçə maddəsi ilə cərimə oluna bilər.

Bakı şəhər Dövlət Yol Polisi İdarəsinin sözcüsü Vaqif Əsədov deyir ki, ümumi istifadə üçün nəzərdə tutulan küçə və prospektlərdə belə hərəkətlərin edilməsini inzibati xəta hesab edilir. Kimsə öz idarəetmə qabiliyyətini göstərmək istəyirsə bunu nəzarət altında və qapalı şəraitdə etməlidir. Bu qaydanı pozanlar aşkar edilərək cərimə olunur.