“Formula 1” mühərrikləri: Həcm və güc nisbəti - FOTO

Ötən əsrin 50-ci illərində avtomobil yarışları bərpa edildikdən sonra ən çox müzakirə edilən məsələlərdən biri, bir çox hallarda birincisi mühərrikin həcmi olub.

Avtosfer.az-ın xəbərinə görə, 1947-ci ildə yarış avtomobillərində kompressorsuz mühərriklər üçün həcm limiti 4,5 litr, basqılı mühərriklərdə isə 1,5 litr müəyyən edilib. 
Sonrakı 60 il ərzində həcm, silindr sayı, yanacaq növü dəfələrlə dəyişikliyə uğrayıb. Hazırda qüvvədə olan normalar isə 2014-cü ildə F1 Strategiya Qrupu tərəfindən hazırlanıb. Bu reqlamentə görə:
- silindrlərin sayı 6-nı keçməməli, mühərrik V şəkilli olmalıdır;
- mühərrikin maksimal həcmi 1,6 litr olmalıdır;
- dövrlər sayı 15 000 dövr/dəqiqə ilə məhdudlaşdırılır;
- turbokompressora icazə verilir;
- rekuperativ tormozlamaya icazə verilir (yük avtomobillərindəki kimi işlənmişç qazların enerjisi ilə tormozlama);
- maksimum yanacaq sərfiyyatı 1 saata 100 kiloqramı keçməməlidir;
- standart yanacaqla bərabər, 5,75%-lik metanol qatılmış etilsiz benzinə də icazə verilir.     

Həcm az olsa da, bəzi mühərriklər 1 000 at gücü hasil edə bilir. Bu mühərriklərin standart avtomobillərdə quraşdırılmaması isə başqa bir söhbətin mövzusudur.

Vüqar Yaşaroğlu