"Genesis G70" modeli yenilənib

Cənubi Koreyanın Genesis brendi G70 modelini yeniləyib. Genesis G70 modeli 2024-cü il model ilinə addım atıb: Cənubi Koreyada bu model sedan və universal kuzovlarında təqdim olunur və indi o, iki yeni eksteryer rənginə və yenidən işlənmiş interyerə sahib olub.

Ən böyük dəyişiklik kapotun altında baş verib, G70 modeli 2,0-litrlik turbomhərrikdən məhrum olub və indi 300 at qüvvəli 2,5-litrlik mühərriklə (ABŞ bazarı üçün nəzərdə tutulmuş başlanğıc səviyyəli versiyadan təxminən 50 at qüvvəsi daha çox güclü) təchiz edilir.

Yenilənmiş Genesis G70 modelinin loqotipi dəyişdirilib - ikiölçülü dizayn sayəsində o daha minimalist görünür. Kuzov rəngləri palitrasında mavi Kawah Blue və boz Bartna Grey çalarları peyda olub. İnteryer üçün də yeni rəng birləşmələri təklif edilir.

Mərkəzi konsolda düzbucaqlı sensorlu panel peyda olub - o, havalandırma sisteminin deflektorlarının altında yerləşir və iqlimə nəzarət sisteminə cavabdehdir. Ön oturacaqların havalandırılması, qızdırılan arxa oturacaqlar və çərçivəsiz arxa görüntü güzgüsü əsas avadanlıqlar sırasına əlavə olunub.

Mühərrik çeşidinə gəlincə, 2024-cü model ilinin Genesis G70 modeli 300 at qüvvəli 2,5-litrlik mühərriklə yanaşı, əvvəlki 3,3-litrlik “altılıq” ilə də təklif olunur. Düzdür, belə bir aqreqat yalnız sedan kuzovlu versiyanın imtiyazıdır.

Cənubi Koreyada yenilənmiş modelin qiymətləri artıq açıqlanıb, sedanın qiyməti 43,15 milyon (55,3 min manat), universalın isə 45,11 milyon (57,8 min manat) vondan başlayır. Ən yüksək səviyyəli 3,3-litrlik mühərriki olan sedanın qiyməti minimum 48,05 milyon von (62,2 min manat) olacaqdır.

autograph.az