“Hyundai” Rusiyadakı müəsisələrini satmağa hazırlaşır

Ukraynayla münaqişəyə başlayandan sonra bir çox brend Rusiyada yerləşən müəsisələrini bağlamaq qərarına gəlib. Bu çərçivədə həm texnologiya şirkətləri, həm də avtomobil istehsalçıları ölkədəki fəaliyyətlərini dayandıraraq, müəsisələrini satıblar. Avtosfer.az xəbər verir ki, ötən mart ayında Rusiyada fəaliyyətini dayandıran Hyundai ilə bağlı yeni açıqlama verilib.
Cənubi Koreyanın MBC media şirkəti tərəfindən edilən paylaşımlara görə, “Hyundai” Rusiyadakı istehsal sahələrini satmaq qərarına gəlib və bunun üçün qazaxıstanlı bir şirkəti ilə razılığa gəlib. Hələlik sazişlə bağlı məlumatın paylaşılmadığı bildirilsə də, Rusiya hökumətindən təsdiq gözlənildiyi bildirilib. MBC-nin məlumatına görə, “Hyundai” satışla bağlı danışıqların getdiyini, lakin hələlik qərarın verilmədiyini bildirib.
Məsələn, bu yaxınlarda “Renault” ölkədəki bütün təsislərini köçürərək bazardan çəkildiyini açıqladı. Həmçinin bu yaxınlarda “Mercedes-Benz” də Rusiyada tamamilə geri çəkildiyini elan etdi. Hazırda “Hyundai” gələcəkdə Rusiyada necə mövqe tutacağını düşünür. “Kia” və “Genesis” kimi markaların daxil olduğu qrup Rusiyada hər il təxminən 200.000 avtomobil satır. Bu pay qrupun ümumi satışlarının təxminən 4%-ni təşkil edir.
Müharibədən əvvəl “Renault”, “Hyundai” və “Kia” ölkədə ən çox satılan brendlər arasında idi. Müharibə ilə bir çox istehsalçı ölkədən geri çəkilsə də, Çin avtomobil markaları bazardakı boşluqları doldurur və müştərilərinin avtomobil tələblərini qarşılayır.

Nərmin Əkbər