"Toyota" drayverlər üçün "Prius" hibridini hazırlayıb

Drayverlər üçün Prius? Bakıda sağ və sol zolaqda sürünən Prius avtomobillərini gördükdən sonra belə bir versiyanı təsəvvür etmək çox çətindir. Doğrudur, Toyota əvvəlki nəsil modeli ilə də belə bir eksperiment aparmışdı və hətta Yaponiyada aqressiv kuzov dəsti və yenidən tənzimlənmiş asqısı olan Prius PHV GR Sport versiyasını təklif etmişdi.

Odur ki, yaponların yeni, beşinci nəsil Toyota Prius hibridində də “drayver” istiqamətini davam etdirmək istəklərində təəccüblü bir şey yoxdur. Bu günlərdə yaponlar GR Sport indeksli seriya versiyasının buraxılacağına işarə edən prototipi təqdim ediblər.

Toyota Prius 24h Le Mans Centennial GR Edition adlı prototip əfsanəvi “Le Manın 24 saatı” marafonunun 100 illik yubileyinə həsr olunub: yubiley yarışı gələn həftə sonu keçiriləcəkdir. Drayver hibridi əvvəlki illərin yarış avtomobilləri ilə birlikdə Toyota komandasının ekspozisiyasında nümayiş etdiriləcəkdir. Lakin onun əsas xüsusiyyətləri artıq məlumdur.

Toyota Prius 24h Le Mans Centennial GR Edition konsepti inkişaf etdirilmiş aerodinamik kuzov dəstinə, təkər tağlarının genişləndiricilərinə və əlavə projektorları olan orijinal ön bamperə malikdir. Liftbəkin ümumi eni 50 millimetr (1830 millimetr) artırılıb. Kapot və antiqanad karbon lifindən hazırlanıb, arxa bamperə isə tamölçülü diffuzor quraşdırılıb.

Şassi ciddi şəkildə yenidən işlənib: ön və arxa təkər izi 40 millimetr genişləndirilib, klirens 30 millimetr (120 millimetrə qədər) azaldılıb. Orijinal təkər disklərinə ölçüsü 235/50 R18 olan şinlər taxılıb. Salonda - idman oturacaqları və modelin “drayver” imicinə uyğun gələn tərtibat var.

Ancaq güc qurğusu haqqında bir kəlmə də deyilməyib: görünür, şou avtomobili standart texniki hissəyə malikdir. İndiki Prius liftbəkinin ən güclü versiyası ümumi gücü 223 at qüvvəsi olan 2,0-litrlik atmosfer və elektrik mühərrikləri ilə təchiz edilir. Şou avtomobili əsasında hazırlanmış Prius GR Sport modelinin buraxılış tarixi hələlik açıqlanmayıb.

autograph.az