Sakinlər park salınmasına etiraz edir: "Maşın saxlamağa yer olmayacaq" - VİDEO

Sumqayıt şəhərinin 17-ci mikrorayonunda, 46-cı binanın qarşısında uşaqlar üçün əyləncə qurğularının quraşdırılacağı bildirilir. Bununla bağlı sakinlərə əvvəlcədən məlumat verilib və artıq ərazidə işlərə başlanılıb.

Lakin sakinlər bu təşəbbüsə etiraz edirlər. Onların sözlərinə görə, layihə həyata keçirilərsə, avtomobillərin saxlanılması üçün yer qalmayacaq.

"Biz bunu istəmirik. Çünki həm uşaqların oynaya biləcəyi sahə məhdudlaşacaq, həm də avtomobilləri park etmək mümkün olmayacaq", - deyə sakinlərdən biri bildirib.

Başqa bir sakin isə narazılığını belə ifadə edib: "Maşın saxlamağa yer olmayacaq. Təcili bir vəziyyət yaranarsa, ərazidən çıxmaq çətin olacaq. Uşaqlar üçün əyləncə qurğuları quraşdırılması adı ilə işlər görülür, amma sonradan ağaclar içəridə qalır və bina tikilir".

Məsələ ilə bağlı Sumqayıt Şəhər İcra Hakimiyyətinin mətbuat katibi Eyvaz Qocayev bildirib ki, qeyd olunan ərazidə sakinlərin rahat istirahətini təmin etmək məqsədilə nümunəvi məhəllələr yaradılır: "İşlər qısa müddətdə yekunlaşacaq və ərazi sakinlərin istifadəsinə veriləcək".