Ödənişli yolda qiymətlər avtomobilə görə müəyyənləşdiriləcək

Nazirlər Kabinetinin qərarına görə ödənişli olacaq Bakı-Quba-Rusiya Federasiyası yolunun ilin sonuna qədər hazır olacağı açıqlanıb. Əhalini  maraqlandıran suallardan biri də yolun qiymətidir.  Qiymətlər əhali üçün uyğun olacaqmı? 

Nəqliyyat eksperti Elməddin Muradlı İnformator.az.a açıqlamasında Azərbaycanda ilk dəfə ödənişli yolların tətbiq olunacağına diqqət çəkib. Bildirib ki, bu yolların istismarı ilə bağlı qaydaları Nazirlər Kabinəti müəyyənləşdirib. "Yolun dərhal ödənişli şəkildə istismara veriləcəyini düşünmürəm. Həmin yolun alternativi hal-hazırda təmir olunur və orada görüləcək işlərdə çoxdur. Qanunvericiliyə görə, ödənişli yol yaradılırsa, ödənişsiz variantı ən yüksək keyfiyyətə malik olan yol kimi insanların istifadəsinə verilməlidir. Ödənişli yolun daha rahat olması və ödənişsiz yolun daha bərbad olmasına dair qanunvericilikdə anlayış mövcud deyil".

Elməddin Muradlının sözlərinə görə, qiymətlə bağlı hələlik konkret razılaşdırılmış bir qərar yoxdur. "Həmin məsələyə Nazirlər Kabinetinin qərarı ilə Taarif Şurası baxacaq. Qərar verildikdən sonra da artıq qiymətlər açıqlanacaq. Bildiyim qədər qiymətlər əhali üçün münasib olacaq. Hər bir maşın növünə aid fərqli qiymətlər müəyyən ediləcək".